يحكي ان

 ولادي بزاف وراني عارف بلي راح نلحق يماكم الله يرحمها وحبيت نقلكم بلي ماشي حنا والديكم تاع الصح ولازم عليكم تحوسو عليهم وحاب نوصيك يا جميل بختك اتهلا فيها و وين تروح اديها معاك... وماټ ذاك الشيخ وجميل وجميلة بقاو مع بعضاهم كل يوم جميل يخرج للصيد وأختو جميلة فوق حصانها معاه تلعب مع الفراشات حتى وحد اليوم شافوهم خالاتهم الشريرات وعرفوهم بسرعة لأنهم يشبهو ليماهم كي شافوهم خافو وراحو عند الستوت وحكاولها القصة قاتلهم ما تخافوش أنا نهنيكم منهم ... 

واحد النهار جميلة قالت لخوها جميل اليوم ما نروحش معاك وزيد راني فالدار مع الخدم ما تخافش عليا قبل جميل طلب أختو وراح وخلاها وبعد مدة جات ليها الستوت دقدقت على الباب وفتحتلها جميلة ومبعد سقساتها
اسمحيلي شكون نتي قالتلها يا بنتي أنا كنت حبيبة يماك الله يرحمها وجيت نشوفك بعد ما ماټو والديك فرحت جميلة ودخلتها للجنان لي كان بزاف شباب الستوت حارت فيه وعجبها بزاف بصح ما بينتش وقالت يا بنتي الجنان تاعك مليح بزاف بصح خاصتو حاجة تحمست جميلة وقالتلها واش هي يا خالتي دوك نقول لخويا يجيبهالي قالتلها خاصتك العين لي تصب ماء تاع فضة وما تلقايها غير فجبل العجائب وراحت وخلات جميلة على الجمر والعشية كي جا خوها خبراتو بهذي العين وطلبت منو يجيبهالها ما قبلش جميل وقالها الطريق لثما بعيدة وصعيبة بزاف كي سمعت جميلة الكلام خاڤت بصح فضولها ما خلاهاش تمنع خوها من أنو يروح ....
الصباح راح جميل على الحصان تاعو مشى مشى حتى لقا شيخ كبير ولحيتو بيضة وطويلة وشعرو ثاني وباين عليه ناس ملاح كي شاف جميل تفاجئ وقالو يا وليدي علاه جيت لهذ البلاصة حكالو جميل الحكاية الشيخ حار وقالو هذي ختك تكرهك حتى بعثتك لمكان كيما هذا قالو جميل لالا هي تحبني بزاف بصح فضولها ما خلهاش قالو الشيخ باين تحب أختك بزاف بصح يا وليدي هذا الفضول قادر مع الزمان يولي طمع المهم أنا راح نوريلك الطريق كي توصل للعين تلقى حنش كبير إذا لقيتو مغمض عينيه وملفوف على روحو اعرف بلي راه فاطن وراه 
فيك وإذا لقيتو فاتح عينيه اعرف بلي راه راقد وفوت للعين املا طاس وكي تروح فرغو فالباسان تاع العين نتاعك وراح يولي الماء تاعها فضي جميل شكر الشيخ وكمل طريقو حتى وصل للحنش ومن حسن حظو ودعوة الخير لقاه فاتح عينيه يعني راقد سرع ملا طاس وراح...
لما وصل عند جميلة حضناتو وفرحت بخوها وبالعين لي شافتها تجري بالماء الفضي اللامع وفالصباح التالي جات الستوت وفي بالها بلي جميل ما سلكش من جبل العجائب بصح اڼصدمت لما شافت الماء الفضي في جنان جميلة بصح ما بينتش صډمتها وقالت إيييه يا بنتي الله يبارك روعة بصح خاصاتو حاجة قالت جميلة
واشنو هذي الحاجة يا خالتي قالتلها خاصاتو الشجرة لي كل ورقة فيها تغني غنية مختلفة وراحت كي العادة وخلات جميلة على الجمر...
وحكايتنا مازال ما تمت وغدوا إن شاء الله نكملو