مرمره

الله على الزين الي فيها.. طلعت اكا المرمره من شونها وحطتها على خد البنية .. لقات البنية خدها يضوي ويلمع اكترمن المرمره . 
روحت للسلطان حكات له على اللي صار الكل واللي شافاتو وقالتلو راهم عيله خر طر مهبله امساكن ومافيهمش عقل وراهو الهبال وحلة والعقل زريعة والي مشا عقلو ما عاد فيه نفيعة.. قاللها السلطان مادامها شبابة ومزيانة .. وانربيها ع ايدي ونعلمها ونوريها لين اتولي سيدة القصر...قالتلو يا سيدي النصيحة من الدين ولا يعجبك نوار الدفلة في الواد عامل ضلايل ..... زاد كبش وقاللها منها نخلق ....قالتلو على الضالين امين ...ايا نصبوا الزينة والاضواء في المدينة وع القصر وعملو عرس سبع ايام وسبع ليالي وسبعة أيام زايدين.. ونهار الخميس جابوا بنت دردنوا الصغيره ودخلت للقصر.. وعيلتها في عوض يغنيو ويزغرطو ابداوا يندبوا ويعيطوا بعيد علينا وعليكم .. كيفاش كيفاش أختهم الصغيره تتزوج وهوما لا...
المهم دخلت البنية والسلطان فرحان بزينها الي لا هب لا دب لا في بلاد ولا في عرب.. لكن لقاها تبكي ومتغشة سألها شبيك قالتلو كان انت ټموت .. انا بعد ما خذيت السلطان شكون باش ناخذ بعدك ! 
غزل السلطان وكتمها في نفسه وسكت نكدت عليه هالبلوى من اول ليله .. لكن في مخو يقول اتو تتصلح .. وانا نعرف عقلها خفيف .. نهار من النهارات لقاها لابسة جبته قاللها شبيك قالتله عجبتني البستها .. وهو جايبلها الغالي والعالي وخيار اللبس .. من حينو فيسع جابلها شكون يعلمها كيفاش تاكل وتشرب وتلبس كيما السلاطين .. ويعلموها طريقه الكلام باش تولي للا وحرم سلطان السيدة الاولى ههههه قول فات عام وهو يلمع فيها .. لكن مافيش فايدة وهي كل مره تعمل عملة اكبر من اختها و هو يبلع ويغص ويقول خليها في القلب وټجرح ولا تطلع من الفم وتفضح .. مرة من المرات عندهم ضيافة في القصر.. تمشي للمقفول تحط ملح علي الماكلة بعد ما طيبوا الخدام وكملوا .. الضيفان جاتهم الماكلة مالحة شب .. سألها السلطان .. علاش عملت هكا قالتلو ناسك برشا تو كتعجبهم الماكلة يوليو ماشين جايين علينا وتوفالنا الماكلة ونقعدو جواعة.... والسلطان باقي يبلع ويغص وموش عارف اش يعمل معاها باش يعقلها.. في العام هذاكة حبلت وجابت ولد .. فرح السلطان والناس .. والولد جا صيفة الرحمن ما شاء الله اش خلق وصور.. السلطان فرحان بالولد دخل عليها نهار من النهارات.. سألها وينو الولد باش يوريه لصحابو جاو يباركولو.. يلقاها حاطه الولد في سطل ومهبطتو في البير .. جا السلطان يجري خلط عليه لقاه غارق وقريب ايموت .. قاللها قولي ياخي وينو عقلك وكفاش قالك مخك ترمي الولد في البير قاټلو حبيت نغسلو
تجن عليها وماعاد طاقو صبر ..وطلقها .. قريب قتلتله ولده .. وقالها اللي تحب عليه هزو طلعت من القصر وما هزت معاها شيء .. روحت لخواتها .. قعدوا يعاركوا فيها كيفاش تروح إيدك فارغة برا توة ارجع للقصر . . وخوذ أغلي حاجه عندو وديما يكلم فيك أعليها .. سمعت كلام اخواتها وروحت للقصر... 
استغرب السلطان شبيها رجعت.. شافها دخلت لبيت الراحه هزت المصلحة وشيتة حاشا وجوهكم .. وطلعت والسلطان قاعد يغزر وباهت في عجب ربي ومستغرب .. مستغرب فيها مطلعتهم وطالعه بيهم تجري .. سألها علاش هازتهم هاجت فيه وهي تلعلع وقالتله مش انت قلتلي خوذ اللي تحب عليه هزو معاك .. واخواتي قالولي جيب أغلي حاجه في القصر وانا عندي عام قاعدة في القصر .. وانت كل ماتدخل تقول نظفوا الحمام سيقوا بيت الراحه نحبها ديما نظيفة وريحتها فاوحة .. يعني أغلي حاجه عندك هي النظافة وهي ما تنظاف كان بالمصلحة والشيتة. ضحك السلطان وقال عملة وعملتها بيديا .. لاهي طامعة لا في فلوس ولا في مجوهرات ولا عز ولا نفوذ لكن العقل يجيبه ربي برا الله يهديك ادخل لبيتك ولولدك .. إن شاءالله ربي يعطيك العقل ورجعها السلطان .وضحك وقال الزين في العقل والي لقا راحتو في الهبال ما عندو ما يعمل بالعقل .
العقل ميزانه يتثقل بالذهب وماعمره الزين يعمر الديار والزين بلا عقل كالباب بلا قفل ....
وخلاصت حكايتنا ليوم ونلتقي مع قصة اخرى إن شاءالله